2009年6月19日 星期五

搬屋-(準備)收拾中

仲有12日就要搬出現時的居所,我仲未開始執野呀!!記得上次搬屋,唔到搬前2晚都唔捨得執野,成日覺得咁早執會好唔方便,到要用時就好麻煩。所以就喺last minute先極速執就無衰(籍口籍口籍口!!!哈哈!!!)

今次會在姐姐家暫住數個月直至收樓為止,咁就頭痕啦,啲物件要分開放,光是諗那些放在姐姐家,那些放在倉都有排諗,有排煩!我什麼也要就手(雖然最後可能是用不著),咁即是什麼也要跟身啦,何來咁多地方俾我擺放!OMG!!HELP!!

可能快將要離開,突然好依依不捨現居。。。沙田的冬天是特別凍,還記得剛搬進來的第一個冬天,凍到我忍不住買了2個暖風機,一個俾自己,一個俾雙親,最後是老爸霸住用。。。
唔寫住,要諗下啲物件要怎樣放先!

做媒

唔知點解,近排突然有些人很主動替我做媒,除了有某某勁硬銷佢個friend外,最攪笑是連賣樓個經紀都問我喜歡什麼類型,說想介紹佢舅舅給我識!咩事呢吓!!說起上來也覺好笑,年輕也沒有什麼追求者,唔知係咪因為當時身邊有個人;反而近幾年,久不久也有些出現下。。。當然合不合心意又另一樣野啦!但都是嗰句,隨!緣!

吾友馬姐喺呢方面比較aggressive,佢話好又一餐,唔好又一餐,叫我乜都試下,頂!你估試衫試鞋咩!

不過也多謝大家為我的感情事張羅,有好野記住介紹給我!似劉華或吳彥祖既會優先受理(發緊夢)!!

2009年6月14日 星期日

置業

終於置業了,昨晚用了極速時間做了決定,連屋都無看過就做決定,真是意想不到,也不是我的作風,但突然心血來潮有種感覺,覺得就這個了!早一個月前已看過附近差不多坐向的單位,很開揚,也頗喜歡,但想多一會便被人買了。

或者有人說現在不是好時機,但對我來說是有這個需要又在能力範圍內,是自住又唔係炒,不想再浪費金錢租屋住幫人供樓;早幾年沒有刻意為自己將來打算,依家開始也不會太遲。

朋友 恭喜我成為業主,其實我也沒有太大的感覺和喜悅,只是斗室一間,又揹了筆長命債;反而最值得開心是不用再煩每隔一至兩年要搬一次屋,叫做可以settle down,搬屋真係好Q煩!

現在只要煩多一陣子,希望快些辦妥按揭的事宜,但願其他的事沒有大問題吧!
__________________________________________

當中發生了小插曲:
我以為持票人就算今日入票,下個工作天才會過數,自己懶醒地以為在星期一前入數便沒有問題,點知係就係下個工作天才會過數,但持票人會知道發票人的戶口有冇足夠的金額;頂,業主話如果1時前戶口都出現唔到條數就唔賣(經紀說因今日有人出高於我個價),那時是12:45pm,我正在巴士,便立即下車,幸好附近有那間銀行,便找現金入數機入錢(其實錢我已準備好只不過未入),點知在現金入數機每日最多可以入二萬元,生死時速,我想那刻腎上腺素激增,便跑去櫃檯排隊,最後在一時正辦妥!事後仍有餘悸之後,告知友人P,被駡到狗血淋頭,頂,我知是自己疏忽,但個心剛剛先定下來,突然被駡,忍不住喊了出來!

2009年6月9日 星期二

至愛早餐組合

這是我的至愛早餐組合-多士,脆煙肉,茄汁豆,多士要搽牛油和蜜糖!多美味!多士跟脆煙肉一次可以吃上很多很多片,百吃不厭!

當然這個美味早餐不能多吃,絕對是增肥之選,所以只能待去旅行才能放縱一下自己;平日上班,早餐多是香蕉一條+咖啡;週末便可以吃牛油蜜糖多士+咖啡或麥當當通粉!

這相片攝於數年前的曼谷旅遊,下榻於文華東方酒店,早餐質素當然有番咁上下,每朝光是吃早餐也用上個多鐘,早餐設於戶外但也不覺熱,旁邊是湄南河,吃時有陣陣的河風吹過來,欣賞河景和對岸的景色,優哉悠哉!

零食新寵-綠茶tohato

同事小S替我買既綠茶tohato,有6包呀!!佢屋企樓下間零食店賣$6.8@,好抵呀,比公司附近間零食店平左$3(我喺百佳見到原味都賣成$13包添!!);好好味,不妨一試!另外小S仲幫我買左2盒奇異果味百力支,好似是$8@,又係平左好多,祖兒話佢喺citysuper見到賣成$20盒,你話啲連鎖超市食水幾深呀!

另外我仲買左綠茶餅,好香脆!


有同事去完英國買了一堆古古力返來,我當然要抽抽水啦!


同場加映既係,今日食晏時落狗屎(英語時間:形容落雨落到好似狗屎咁是rain cats and dogs),出去時無下雨,多數人都無帶遮,個個食完晏返來都俾雨淋濕晒,某老細經過我個位時見我影緊相,仲企定定俾我影埋佢個see through look!wow, so sexy =_=”