清貨！

之前公司換了新的ｌａｐｔｏｐ，上星期就搞拍賣那些舊電腦；拍賣後那些錢將撥入康樂基金，有創意！呢幾日，我開始執番啲買左但無用到的東東出來，然後放上拍買睇下有無人買，唔好嘥！

清貨ｌｉｓｔ如下：

－Chanel眼部卸妝液（已售）

－片裝面膜五大盒，都未計十月喺臺灣買個啲我的美麗日記

－Anna Sui手帕三條

－Anna Sui八達通套一個

－名牌護甲油

－Water2雪山水支裝面膜

－Body Shop及Crabtree Body Lotion

－精品擺設

還未計那些開左但只用了一兩次的護膚品！面得一張，都唔知買咁多做乜，滿足我的購買慾多於一切！

Family

星期六，陪老爸去看醫生；首先要看家庭醫生驗糖尿病，醫生問佢仲有無飲酒，佢居然講大話，答＂閒唔時啦＂，嘩，日日飲都叫閒唔時，我當然即時揭穿佢啦！幸好今次沒有超標，可以做白內障手術，之後下午便去看眼科，檢查完便約時間做手術！老爸依家又要帶助聽器，隻眼又睇唔到野，真係眼又矇耳又聾，人老便百病纏身，冇計！
喺佐敦睇完醫生，之後便約左姐姐喺Ｅｌｅｍｅｎｔｓ等交番阿Ｂ俾佢，不太近又不太遠，咪行過去（老爸不喜歡打的，嘥錢麻）；行行下個懶Ｂ投訴話好攰，兩老都未出聲，最後生嗰個喺度呱呱叫！依家啲細路身嬌肉貴，行兩步叫攰（平時自己玩跳成個鐘又唔叫攰），唯有一路行一路問佢問題轉移佢視線！
老爸手上拿著袋東東，我見要行一段路便幫他拿，他硬是不用我拿！或者他覺得他有能力做的便自己做，不想什麼也依靠我們！

姨姨跟老爸一樣，今天陪她行街買羽絨褸，本來諗住送給她，付錢時她爭住俾錢，說不好意思什麼，她很開心地告訴我她現在有份兼職；姨姨婚後便沒有工作，在家相夫教子，現在有份兼職，可以賺點零錢，雖然不是很多，但她很開心自己還有賺錢的能力！

金魚的三秒記憶

有日，某人說了個金魚的實驗給我聽．．．他說科學家奇怪為何金魚可以快快樂樂地在細小的空間生活，研究發現金魚的記憶只能維持三秒，所以就算生活在細小的樽內，三秒後，牠便忘記之前在那裡，所以同一個地方對於牠來說三秒後便是新的，不會沉悶！其實他想話俾我聽他的死敵像尾金魚，記憶力其差，還教我怎樣應付這些人（在工作上）！

我想跟他說，阿哥，你知唔知你自己都係咁，你唔好五十步笑百步啦！

衫

今日執屋，掉左四袋垃圾，但唔覺吉左好多地方出來，我諗我真係買埋太多東東，尤其是衫！買歸買，唔知點解，著來著去都係嗰幾件，成日都好似唔夠衫著！買來買去啲款同顏色都差唔多（我諗剩係我自己先分每件衫的分別）；款多是娃娃的，顏色麻，跟我熟的人都答到，黑白灰永無甩拖，黑更是主打！如果喜歡個款（當然是著得我瘦啦），我是可以一色多件的，但就俾馬姐鬧我痴線．．．仲有橫間也是我的”賣飛佛”，馬姐話啲肥人硬係要著橫間（又啱喎，我跟菠蘿油都好鐘意著橫間，咁喬既），是想話俾人聽我其實唔係好肥，係因為件衫是橫間，望落去肥咋，自欺欺人喎！事實只係我覺得橫間幾型ｂｏｒ，沒其他原因！佢見親我著橫間，都話我滑嘟嘟扮漢堡神偷！哈哈！

屋企細，只可放個極細的衣櫃，連爛ｇａｇ哥話佢個衣櫃都大過我（一個不太買衫的男人的衣櫃都大過我，你話死唔死）；可想而知我啲衫是點放，像玩層層疊咁，只可摺好疊高佢，取衫著時量不取下層啲衫（驚橦衫山＂林＂左要再摺過）！

真係要諗下計！

環保小子

星期五，又收到同部門環保小子的電郵（說是又，當然不是第一次），今次內容大致是建議大家在放工時把電水煲電源關上（尤其是放長假前），他還詳細地例出各項使用時間，使費，最終要多少棵樹才能彌補我們的浪費！真是佩服，佩服！最重要是他ｓｅｎｄ晒俾全世界，十分有＂吉史＂，我都不知幾想按＂ＲｅｐｌｙＡｌｌ＂ｓｅｎｄ個＂請大家一起合作，救救地球伯伯＂的ｅｍａｉｌ出去，哈哈！！他不是要出什麼風頭（我諗），還會身體力行，例如他在吃午飯前會先去各同事的坐位把他們的芒關上（我發現後也會自動波地關上自己的芒），包底吃埋／拿走ｐａｒｔｙ吃剩的食物；其實很多時只要出丁點力便可幫個忙，不費時，為何不做呢？！如吃午飯時順手關芒，影印時盡量用雙面，天亮時不開燈，關上不看的電視。。。等等！很多人（如我）口中也會掛著＂環保＂的字眼，但真正行動的又有幾人！
此小子還時常參與慈善活動（什麼行路上廣州，天水圍慈善跑。。。），當然會拿著張捐款ｆｏｒｍ在公司內四出籌款；有些同事覺得佢密左啲，但我是支持的，平時都不會主動做善事，又唔使自己行，剩係出錢支持下，又可以免稅（雖然多數我會忘記申報），當幫自己積下福，何樂而不為！！
十分欣賞此小子，敢作敢為，敢出聲又夠薑ｓｅｎｄ　ｅｍａｉｌ俾全公司的人提出環保的意識不會有很多人！不明為何他的行動／環保建議不被同事們接受（雖然有時是過了點火，但出發點是好的）；現今的都市人，多數都各掃門前雪，有幾多人真係會放眼看世界，關心社會，肯為社會出點綿力！

又整親

星期二打波時拗柴，整親隻豬腳（又係左腳）！今次仲勁聽到＂肋＂一聲，嚇得我！波友們即走過來看過究竟，車厘子叫我郁下隻腳，我問佢點郁，佢話上次佢整親係我教佢，鬼記得咩，個陣時求其嗡當秘笈，隻腳又唔係我，梗係叫你郁下，鬆下隻腳啦！痛嗰個又唔係我！嘩，好卑鄙呀！
睇左跌打，醫師話傷左韌帶，要覆診，看了兩次，不能再看第三次，因為啲皮膚敷了藥後開始敏感，紅晒起粒粒，好Ｑ痕呀！頂！

慳家

有時我覺得自己幾慳家。。。（好慳唔慳嗰隻）

＠唔知幾時學到咁慳（其實唔想浪費食物），見到雪櫃仲有啲新年剩餘物資－蘿蔔糕同馬蹄糕，已經過左期幾日，聞到沒有異味，便煎來食，蘿蔔糕還ｏｋ，食第二塊馬蹄糕時有啲酸酸地，便即刻吐了出來，頂，食左一塊架，希望唔會肚痛啦！

＠有件衫，由出街衫著到變睡衣（仲要洗到穿左個小孔），我諗著左六七年，都唔捨得掉。。。直至今日洗衫，準備拿去洗時，我忍不住問自己，我家下無衫咩，幾十件衫放喺度唔著，新既舊既無爛既都唔著，要走去著件爛衫，想點呀我！最後終於狠心地。。。永別啦！

山頂半日遊

星期日，跟Ｐ去了山頂；事前無說定去那裡，我著了高跟鞋加埋個ＡｎｉｍａｌＰｒｉｎｔ袋；本來這個裝扮不是問題，但當行行山徑時，越行越不對勁，不是覺得攰，而是發覺不是穿球鞋的行山者全是自由行人士呀頂！！！超級異相，都係折返去番廣場那邊！下次再行過啦！
在山頂廣場去了Ｓｐａｇｅｔｔｉ３６０食ｔｅａ，食物一般；沒有特別不多提了；事後才發現我家附近也有分店，早知試另一間啦！在ＯｒｇａｎｉｃＴｉｍｅｓ買既薑糖很好食，不是很甜又重薑味，正！

另，在行山徑我遠處看到有一隻大狗，真的很大隻，未企直已經到我膊頭，大隻過諾威拿，但沒諾威拿咁肥，是鬥狗型！我立即躲在Ｐ的身後（其實他都驚），真係好嚇人；走近時才發現原來不是一隻，而是兩隻，最重要是兩隻都無用狗帶，雖則牠們好似好聽主人話，跟住主人行無亂走，但我覺得那主人好無公德心，不論牠們有幾聽話，始終是隻動物（仲要咁Ｑ大隻），去到公眾地方煩請用狗帶，你永遠估不到有無突如其來的事ｔｒｉｇｇｅｒ到牠們發癲，到時傷及無辜你又過意得去嗎！！那時才知錯，道歉已沒用了！

崖上的波兒

好不好看？！ｏｋ啦！ｏｋ是因為背景很靚，顏色七彩繽紛，好童話ｆｅｅｌ，仲有那首歌幫了不少忙；但故事情節簡單，而且有點牽強，相比龍貓，千與千尋，還差很遠，有點失望；請不要帶小朋友去看，五歲學人私定終生，真係教壞細佬！我在中後段忍不住睡著了！
最有趣是吾友大Ｎ，堅持要看日本版，說有山口智子和ｘｘｘｘ配音，我跟好友Ｓｏ不約而同覺得大家都不懂日文，也不是時常看日劇，鬼知邊把聲是邊個咩！不過，我覺得還是日本版原汁原味些！
我諗Ｂｅｎｊａｎｍｉｎ　Ｂｕｔｔｏｎ好睇好多！唔知幾時有得睇呢！

新ｌｏｏｋ

有兩樣野應該要做但拖了很久仲未做，呢幾日終於的起心肝做左！ｙｅａｈ！

＠換電話
之前部ｓｏｎｙ個ｓｃｒｅｅｎ俾我跌到神神地；年廿九又無故按不到，仲要一日兩次呀頂！真係忟死人！卒左好耐先至無事；一心去３出部Ｎｏｋｉａ５８００，點知無紅色，唯有等囉，費事買部唔鍾意。。。初三見衛訊有紅色而部ｓｏｎｙ可以ｔｒａｄｅ到＄１０００（３ｔｒａｄｅ到＄８００咋），真係拿拿林換左佢；其實部ｓｏｎｙ都幾好，如果唔係個ｓｃｒｅｅｎ又神左，我都唔捨得唔要佢！依家用用下，覺得Ｎｏｋｉａ都唔錯！

＠剪頭髮
上次剪頭髮已是上世紀的事（無咁誇，上年五月遮，長頭髮就有呢種好處，唔使修得咁密）。。。本來想新年前剪，但超級多人，其實最主要是我未諗定去那裡剪；一向去開尖沙咀ＩＬ Ｃｏｌｐｏ，剪得好好，可以ｋｅｅｐ好耐而且快（剪得快同唔使等，我最憎那些ｂｏｏｋ左都要等成個鐘，Ｆｕｌｌ咪出聲囉，又唔講，坤左你去先，洗濕你個頭然後叫你坐係度等，ｏｎ九九坐係度又唔郁得唔知做乜，坐到ｓｅａｆｏｏｄ痛，需知我分分鐘上落幾千萬（咩貨幣呢，吓）架ｍａ！），唯一不好是勁貴，齌剪都＄７５０，做埋ｈｉｇｈｌｉｇｈｔ（連埋ｌｏｗｌｉｇｈｔ，加埋ｂａｓｅ　ｃｏｌｏｒ，３隻色望落去好有層次感，又確係靚啲），但無二千都出唔到門口（會送番個ｔｒｅａｔｍｅｎｔ過你）；掙扎良久，魔鬼喺耳邊講＂一年一次，除開都唔係好貴。。＂就係咁，便打去預約，點知ｆｕｌｌ晒！算，唔急，無謂同人迫，等過左年先剪；上回合魔鬼戰勝天使，今次賽果３６０度逆轉，天使勝出（因買了電話，ｂｕｄｇｅｔ有限），便到家裡附近那間（同尖沙咀嗰間是同一集團，不過是經濟版），呢間平好多，仲要有折，剪髮連Ｃｏｌｏｒ只需七百多元，ｏｋ啦！其實我既要求好簡單，額前啲＂蔭＂剪短啲，後面的頭髮剪簿些！既然咁簡單，先前又點解要去間咁貴呢？！但又真係有人連咁簡單都剪得不好！