病。。。

啱啱個weekend因為仲病緊，加上星期五晚走左去唱K，星期六連聲都無埋；上晏很辛苦地爬起身走去睇醫生，之後便開始大昏迷時間，食完就瞓，瞓完就食，食完就瞓，瞓完就食。。。如是者去到今早，完全覺得同隻豬無乜分別！

今朝起身雖然仲有鼻涕，但精神好好多，希望快Ｄ好番！

凸點

有無發現你身邊男同事會凸點．．．無錯，是男！同！事！！唔明唔明！我公司就有數個，有個是肥既就唔使講啦，應該有42A要戴bra添啦！另一個就似羅茲威爾，不算勁肥，但肚腩凸，點也凸．今日靚仔金菠蘿就喺櫃桶攞左幾張藥水膠布出來話俾肥仔同事（肥仔很高大架）用，超低能就話個範圍唔夠大，叫佢貼時要打交叉．咁金菠蘿就攞張紙摺左個正方形問夠唔夠大，因為張紙大，摺完出來較厚，咁超低能話唔得，咁厚咪仲凸！！！咁佢又啱喎！！

之後，金菠蘿攞左兩款硬幣出來，一個是一毛，另一個是一蚊，正研究那個是肥仔的size時，羅茲威爾咁啱又喺附近，知我們笑佢凸點，轉身過來睇下發生咩事；超低能話佢應該是一毛，肥仔先係一蚊，我說呢啲野未必同身型成正比，反倒肥仔個size是一毛，羅茲威爾是一蚊呢？？！！

咁都笑，講一餐，我都話我的同事是好低能，又一例証！

SOTHYS的透明質酸膠原療程[C]

早前看過圓圓介紹呢個Sothys facial（詳情可參考圓圓這篇blog，不贅）已經心郁郁，但那時手頭上package還未用完沒有行動，再加上一次在詩琳做facial的bad experience後（按摩是急急的，不到位，令人完全不享受，還有勁hard sell，每次也慫恿你加這買那！xYz%#$@#$），便決定找日去試試這個口碑不俗既facial。

也不是每間美容院也有sothys這個品牌，上網查一查，有間在海逸豪園都不錯，試做價是便宜一點，奈何太隔涉了！後經圓圓介紹，去了泰殿搵甜姐兒joyce試做這個facial！做facial要看的除了用料和價錢外，手勢是很重要；之前在沙田那間手勢不錯，但現在已不是住沙田，又用完手上套票，便趁機去試！

有人介紹，總好過胡亂試，甜姐兒joyce手勢也不俗，也很細心解釋每個步驟．


設有獨立房間加shower room，私穩度十足！


是次facial的用料（左）和facial後果（右）

Comment：

做了一次，或者膚質不同，沒有預期中的水潤飽滿，紋理明顯減淡的效果；面部瑕疵多的朋友（如我）想做完一次就有脫胎換骨（即去斑去印）的效果就當然無可能，但美容師joyce說那個火山礦物泥peeling有助減淡黑色素．我發現做完後面部緊緻度提升了，肌膚嫩滑了，毛孔也細左．最喜歡那個按摩過程，連頸部也有照顧．

這個價錢（HK$840）連眼，面和頸部護理（頸部護理也很重要），其實也算合理！

是日宜燒烤

今日是部門燒烤日，11時在公司出發，咁基本上返到公司都唔做野啦！險些泡湯，因大老闆怕凍，最後決定早點開始，他可是個老外來的，何解那麼怕凍，奇！

選址是大美篤郊野公園，距離我家只有１０分鐘車程，我當然選擇不回公司直接去．同事數字頭揸車順便來接我，我倆第一批到達，見到人頭擁擁己心知不妙，下車去搵爐，一無所獲；真的給我講中，適逢燒烤季節，應該是中小學生的郊遊旺季，要早些去霸位！事關重大，唔通要幾十人來到一齊等爐咩，實俾人小，便立即致電報告長官，電光火石間，長官決定移師至西沙泥涌郊野公園！幸好，那邊多爐，唔係就大檸樂！

如往年，食物必是上上等貨，新來的同事無一不嘩然！大大隻既帶子，老虎蝦，近百元一塊既牛排，豬排！還有韓國老闆order既韓國牛肋骨，豬肋骨．．．食到大家津津有味！掛住食，搶食，連相都忘了影！

三時多完畢，之後去左唱Ｋ！玩飽，食飽後，晚上又開始唔舒服，繼續病過！

病了

未凍前很想天氣快點轉冷，到氣溫驟降時，身體卻抵受不住嚴寒的天氣，得了感冒。星期二起床時勁頭痛，睡多一會連手腳都痛埋，即代表發燒，因為路途實在太遙遠，也難得去睇醫生了。食了粒PANADOL便繼續再瞓，瞓過飽應該會好番罷，整日整個人也是冷冷的，雙手雙腳未曾暖過！昨晚又轉差，今早忍不住要去看醫生！

噢！明天還要去燒雞翼，不去的便留在公司工作，咁幾病都要去啦！

物以類聚呢?！

我成日跟同事祖兒和小S說，公司阿某某好低能呀，阿邊個原來勁白痴架。。。圍繞著我的一群人都是一樣，外表斯文內裡低能，我懷疑過係咪大家在迎合我呢定是呢D叫物以類聚呢?！應該是我將大家潛在既低能本色發揮出來，我只是個催化劑罷了！先旨聲明，我口中既低能白痴，完全不apply在工作上，工作時是另一個人來的！

表表者是'有能'，成隻馬騮咁，周身郁，企喺度都覺得佢低能；另一個是鬈髦強，成日講英文爛gag，我又十分喜歡玩佢，而佢又最好的唔理我，唔嬲！

還有一個是我個team個PM數字頭（另一個PM叫數字人，真橋，當然花名呢D野大多是我和祖兒改的！），其實佢年紀不大，但最喜歡扮成熟（在我眼中是老土囉唔該），成日話外表太細無說服力喎，人地唔信你，ok這個我buy，但可以扮得型少少，成熟既打扮都可以smart D啫！鬧左好耐，先肯將佢個數字頭剪番正常！佢除左煩D之外，做野都好OK架。
星期五，我地可以著牛仔褲，但佢死都唔著，其實我懷疑過佢無牛仔褲，不過佢話唔係，可能是著牛仔褲唔pro囉。。。

終於上個星期五呢位施主肯著牛仔褲返工，而我又好無聊地影低左。。。

ED mama廚房

星期六就去左網友ED mama屋企食飯，佢親自下廚款待，真係唔講得笑！碟碟都咁好味，食到我地捧住個肚走！

綠色衫嗰位就係大廚ED mama啦！


飯後甜品－－有兩款咁多呀！

首先是果醬為大家準備既木糠布甸


壓軸既係冰糖燉燕窩，好足料架！連燕窩都有又花膠鮑片湯，呢位靚媽真係好客！


仲有仲有，就係Reddy和愛媽為大家準備既禮物。。Elizabeth arden既lip cream我之前也想買來試，太好了！愛媽既溫暖暖牌頭飾，咁凍帶上頭度會唔會暖啲呢？！:P


也識了一位新朋友－－肥痺DD！佢也是傻婆一名！

好多謝好多謝大家，尤其是ED mama－－佢喺廚房廚到塊面紅晒架！