痛心

今晚跟姐姐及阿Ｂ和象皮一家吃飯，飯後準備離開時，看到阿Ｂ的背包打開了，外套也走了出來，着叫他把外套放好，把背包拉鍊關好，他便把背包放在我手，沒禮貌地叫我幫佢整，我當然不會縱容他，小朋友那麼沒禮貌怎行？！我便把他的背包放回椅子上，他不理便算，這是他的東西以及他很沒禮貌！怎知他突然地發難，狂扯我的衣服叫我把背包弄妥，還說是我把他的背包打開，我說沒有便不理他打算離開，他便繼續扯着我的衣服，更踢了我多腳，可知他的力也不少．我忍不住也回了他一腳，在旁的象皮便攬住他，勸阻他（只得象皮跟他的小女兒在場，其他的人已離開），他還是十分不憤氣，便拿枱上的刀掟過來，我嚇了一跳．可幸他掟不中任何人，若不是也不知怎算！象皮叫我離開，我便打給姐姐．．．姐姐到後當然問發生什麼事，阿Ｂ居然說謊話沒有掟過，氣得我，佢怎可講大話！！！姐姐叫他道歉，他不肯，他還趁姐姐看不到，更借故走不過來撞了我一，我為了息事寧人便算了，象皮看見了也苦笑着搖搖頭！最後姐姐便告辭回家了！（原本打算帶象皮的仔女去食雪糕）
姐姐後來致電給我，她說知道是他唔啱，但着我不要找挑引佢，我嬲到呀，我說我肯定我今次沒有做錯，這根本是他有問題（其實她自己也知道的，只是有時他好了一點便不了了之），真的要認真面對！說了兩句，姐姐很不開心哭着便掛了線；我知道她很不開心，跟丈夫婚姻不愉快，對她來說兒子便是她的命根，教導兒子的責任也落在她身上，我知道我不應再雪上加霜，但那一刻真的忍不住還了嘴！

看到阿Ｂ的行為，其實我也很痛心，擔心他長大後會變成怎樣？！可能是獨子又有點錢的原故，婆婆又時常就他，從小他要什麼就有什麼，性格變得很自私．不喜歡很他人分享，行為也很粗暴（男孩子就是那麼樣嗎？！），而他也只是聽從姐姐的說話．姐夫，就只懂買玩具給他！究竟怎樣才可把他教好呢？我知道我是要幫助姐姐，從旁協助她，希望能夠做得到，趁阿Ｂ年紀還少時，應該還可以教！

辦公室趣事－電車T

第一則
早前，問電車T借左個Sony义電係公司用；昨日食晏時，電車T戰戰驚驚問我，係唔係會繼續用個义電，我有點不好意思，話返回公司還番俾佢，佢話冇所謂，係的話，佢會再帶多個返公司，叫我繼續用！真係不好意思，但不明為何佢咁驚我，莫非我真係咁惡，哈哈！！
我唔否認，我成日鬧佢，但佢真是抵鬧（同事雪莉也認同），食飯完全唔理會其他人，啲食物來到時猛咁食，食的速度又快，唔理其他人食左未，有好幾次金同事唔夠飽要叫Tea食．自此以後，我就伸張正義，每每見到佢唔啱就直接話佢，同事祖兒話我好似教仔咁，我話如果有個咁嘅仔我會激死左好耐！仲有，佢成鬼日發呆，同佢講野唔知飄左去邊，又會眼定定咁望住人，攪到人好鬼唔自在；鬧過後有點好轉，但若不是大夥人一起食飯，我跟雪莉會撇低電車T！（真係衰！！）

第二則
昨日同事電車T經過我個位的時候，問我係唔係整過個頭，我話冇，問佢點解咁問，佢話覺得我個髮型有層次左喎，幾好睇，仲叫我Keep住！！我忍不住大笑，話俾佢知其實是我今朝早遲左起身，要以九秒九速度出門口，便趕唔切洗頭，所以啲頭髮Lup到有層次啦，佢唔知應該俾咩反應我，之後O住嘴走左．．．

黃埔．孝勢壽司

昨天放工約左姐姐及兒甥阿B去黃埔孝勢食壽司，姐姐在豐澤買緊冷氣機，我找到位子後便打俾姐姐，她說差不多攪掂．我便點住兩個頭盤先－八爪魚醋物和我的至愛蟹籽沙律，侍應姐姐說今晚頗多人，食物可能會晚一點才到．恕不知兩個頭盤不消十分鐘便到！頭盤到後便打俾姐姐，佢仲喺豐澤，原來售貨員出錯單，要等多一陣；她叫我點定食物先，阿B只吃玉子壽司加冷烏冬，我便點多一客壽司拼盤加玉子刺身（我跟阿B一樣也喜歡食玉子）同姐姐share，加埋先前點的頭盤，我想也差不多！等呀等．．．又十多分鐘，啲食物已經到齊（又話要等好耐？！）；我覺得有啲受騙，好似啲電視劇咁，坤你叫晒成枱食物但最後人唔到嗰款（當然佢唔會呃我啦），忍不住又打俾姐姐，佢話行緊過來，我問佢係唔係行左返屋企，佢話轉個彎就到，等多陣啦；我唔俾佢收線，要傾到佢來到才收線，好變態啊！
係，我承認自己冇耐性，頂！但等左半個鐘有多，仲要對住啲美食，又唔好意思食住等，人都癲呀！

八爪魚醋物（$50）：八爪魚伴海藻和瓜，很清新可口，但酸了一點


蟹籽沙律（$40）：我的至愛，沙律醬，蟹柳跟青瓜絲份量剛剛好，好味！


冷烏冬（$50）：阿B話啲烏冬好滑


孝勢壽司拼盤（$200）－富士：啲壽司好新鮮，$200有兩件拖羅，一件海膽，物超所值啦！


玉子壽司（$15@）：OK啦，但$15一件比較貴

玉子刺身（$10）： 我比較喜歡吃玉子燒多一點

星期六－中環一天遊

星期六，跟P打完Wii後，難得佢今日得閒陪我，便跟他出外逛逛，我便提議去中環歌賦街的勝香園大排檔吃下午茶，食著名的檸蜜脆脆；去到後勁多人，大排長龍，烈日當空下，都係咪攪（其實是驚某君面鬼囉），便退而求其次去九記看看（雖然我已不吃牛了），情況也不相伯仲，最後我便提議去蘭芳園，新鋪未開門，舊鋪又係要排隊，頂！食個tea，使唔使呀！最後去了蘭芳園對面食魚蛋粉算了！物價高漲，有冇加到價我就唔記得，但啲魚片肯定薄左好多！ 食飽飽後便去Pacific Coffee嘆咖啡睇雜誌，多優閒！之後便去蘭桂坊三聯打書釘，最後買左一本書，是The Kite Runner，之前睇完套戲後都想買，但苦無機會，現在蘭桂坊間三聯搬遷大減價，有八五折，抵！謝謝你 ，P！
晚上，去左IFC千両醫肚，星期六晚出奇地少人，等了五分鐘就有位；對比其他壽司店（如峰，Monster，板前），千両的選擇十分少，唔知佢點解唔加多點款式俾大家呢？！

後記，去千両途中，遇到發哥，佢真人是十分有型，而且很親切，雖然頭髮有點斑白，但是更加迷人！正斗啲侍應圍住狂影相（其實佢係路過，真正目的地是利園），佢是滿面笑容，好有大明星的風範，發嫂跟其餘兩位長輩站在旁邊等候，也沒有面露不悅之色，十分難得！其實我都想走去同佢影番張相啊！不過好似好騷擾佢，侵佔左佢的私人空間，回頭望多兩眼算了（諗諗下，我咁大個女，都好似未同過明星影相，千萬個後悔！）

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

打書釘的時候，看張玉珊本美麗大學，要我買就真係唔會啦，唔使錢既都可以睇吓（好cheap啊！但真係唔會嘥錢囉！）內容是分享佢的扮靚心得及宣傳佢間美容減肥中心的Treatment啦！當中有幾樣都幾有趣，又不用花太多錢，可以試試！

1） 益力多洗臉 去角質層－據稱此方法可以去角質層，她話問過醫生，方法可行，因為益力多是活性碳，有果酸，可柔軟肌膚和去角質層．

　　用法：用益力多沾濕化妝綿，以陰力輕輕擦拭面部，避開眼睛（這個我加，眼部肌膚太幼嫩，），沖水，再以洗面膏／奶洗淨；她話用後膚色會變得均勻，她的朋友也試過，效果令人滿
意．
　　我的用後感：只是試過一次，效果不太顯注，可能要試多幾次．

2）白米醋浸腳

　　用法：把全樽倒於盆內，浸腳十分鐘，雙腳好快回復柔軟幼嫩，更具殺菌作用！

　　我的用後感：未試， 因為未買白醋！

3）豬油膏沖身

　　用法：沖完涼後，再用豬油膏（Emulsifying Ointment BP，可於屈臣氏／萬寧買）沖身

　　我的用後感：若皮膚超級乾燥 （如我），效果不錯， 因為乾搽豬油膏會很"LUP"， 濕濕地搽再沖水 ，吸收好似快左， 又不會太"LUP，啱啱好！

4）綠茶水洗面去暗粒

　　用法：正常步驟洗完面後，再用綠茶水沖多次塊面

　　我的用後感：因我冇暗粒，所以冇試！

Mamma Mia!

星期五去看了Mamma Mia！沒有華麗的衣服及濃妝遮蓋下，梅麗史翠普明顯老了！由穿Prada的惡魔變做一個在希臘小島經營旅館的單身母親，返璞歸真的造型也十分討好，畢竟五十有九，能夠保持這個樣子，演繹這個角色，已很難得！沒想到她除了演戲外，原來唱歌也不賴！佩服！記得早前看過一篇她的專訪，當中問她唱歌那部份會不會把她難倒，她說她平時也會每日唱歌－在洗澡的時候－所以也不需要再特別練習！我看後反而領會另一意思，成功的人是不會偷懶，會未雨綢繆做定功課，到有需要的時候就不會倒瀉籮蟹或錯失機會！真的要多多學習！

說回套戲，故事簡單，但希臘小島景色十分怡人，明顯地片中女演員比較特出，媽媽當娜（梅麗史翠普）不在話下，女兒蘇菲樣子十分清麗脫俗，歌聲也很甜美！而媽媽的兩位老友也是唱得之人，我記得其中高的那位有份演電影芝加哥；男角方面比較遜色，最有名氣的007皮雅斯布士南也搶不了鏡，未看時，我還很奇怪為何會找007配梅麗史翠普，好似不是很襯，但看後，完全沒有這會事了；片中皮雅斯布士南那個肚腩十分阻眼（我當然希望他只是為部戲才帶著這條金腰帶啦），當年靚仔有型的007去了那裡？！女兒蘇菲的未婚夫也不像樣！最有趣的是其中一位媽媽的情人的紋身是紋在屁股上，很攪笑！總括來說，成套電影載歌載舞 ，唱著ABBA的歌，由頭帶到尾的歌舞劇，牽起了歡樂的氣氛，我更聽到席上的觀眾在某些情節喺度歡呼！睇得好開心！ 唯獨美中不足是中文翻譯歌詞有點兒馬虎，譯the winner takes it all做”大小通吃 ”，好似喺賭場賭緊錢咁，有點大殺風景罷！

Roaccutane+ La Mer

自從吃了暗瘡藥保膚靈後（終極暗瘡藥，食前要驗血同驗尿，驗血是驗肝烤素，驗尿是驗孕，食時是禁止懷孕），我便與潤唇膏為伍，因為食藥後會收（抽）乾身體裡的水／油份，總之成個人都好乾啦！首當其衝是個銀包，因啲藥好貴（大約千五蚊一個月），其次是個嘴唇，一定要搽潤唇膏，否則個嘴會龜裂，我試過一日忘了帶，上午個嘴裂到差點流血，下午食晏時要去萬寧買支凡士林頂住！依家用緊La Mer Lip Balm（$4xx)，雪花秀($3xx) 同 Dr.Hauschka（$88），因前兩者比較貴，喺公司有時會用Dr.Hauschka中和下．有次，同事雪莉見到我個超乾的唇都忍不住叫我搽下潤唇膏．個嘴唇乾自然會甩皮，有日去做Facial，美容師見我個嘴唇個塊皮，忍不住幫我用較剪剪左佢！勁樣衰！

食左差不多三個月，效果很好，啲粒粒已經冇左，而毛孔細晒；其實上年已食過一個療程（大約六個月）已經好番，最衰的是喺三月底時成日唔洗面瞓覺，攪到啲粒粒又出番來，攞黎衰！試過做Facial，但都攪唔好，唯有食番藥啦！好在醫生話今次唔使食成個療程，好番就唔使食；依家好番，我諗住停藥．始終長期食也不是太好！剛才提過食藥後皮膚很乾，所以現在skincare已改用La Mer Product 朝早用Toner+ Radiant infusion + Gel cream，晚上轉用La Mer cream，其實半年前已經買左La Mer Product，但當時皮膚狀態不佳，用後差上加差，依家好番，而且很乾，用番就啱啱好，又唔使浪費！除了面，身都要勁搽cream，我以前係唔搽cream，但依家唔搽唔得啦！手腳要搽Body butter！

講開La Mer ，早兩日收到他們寄來的試用邀請咭（終於收了，因好友車厘子早兩星期前已收到，我幾驚自己冇呀，哈哈！），憑咭可換取新出的Hydrating infusion試用裝一支，早前也換過Gel cream試用裝，size 也不少，可用上一個星期架（我認為試用裝size 太少的話根本不知道好不好或適唔適合自己，一個星期的份量就差不多，我覺得La Mer好慷慨喎，證明佢對自己的Product有信心）；Radiant infusion效果咁好，唔知呢支Hydrating infusion又點呢？！用後再update大家！除了試用邀請外，生日也會送上生日Gift set，Gift set裡有eye concentrate＋radiant infusion＋Gel cream，好開心可以有機會試eye concentrate，但就冇左支捧，希望效果也不會差很遠！

白花油公主

我諗我可以自稱是白花油公主呵！今日摷袋搵潤唇膏，喺個袋度搵到三支白花油，你冇睇錯，係三支！！好變態！！我習慣屋企床邊放一支，手袋一支，若我發現那天沒有帶佢，會有點心緒不靈架！有次癲到立即走去買番支！白花油好有用，喺公司冇精神，我會攞佢來聞一聞，好提神架！唔舒服或頭痛時，更加需要佢，我覺得發明白花油的人應該攞諾貝爾獎law！好友馬姐曾經說笑話我會用白花油來沖涼，見我搽到個人中位油淋淋同紅晒， 就話我超變態！
早兩個星期，對耳仔塞左,好似有層野隔住左，入到密室情況更加嚴重，對耳仔溫溫聲，頂左一個星期，終於忍不住要去睇醫生，照了耳仔同個鼻，醫生話對耳仔冇事，反而個鼻就塞左，因而影響到對耳仔(明明個鼻是昨天先塞,但對耳仔早兩個星期已經有事,離奇！) Anyway，食左醫生開左啲通管道的藥，四日後已經冇事！ 其實我想講既係，會唔會因為聞得白花油勁得制而影響到個鼻呢?!

若各位也有這個習慣，不妨留言支持下！

*** 和興白花油，愛多八十年！YEAH！ ***

生日週

前天生日，一連幾天都約咗人慶祝，昨晚就約了麻將腳打麻將慶祝，其實跟平常麻將聚會沒大分別，只是生日那位不用付錢吃飯罷了（真特別？！）哈哈！很珍惜跟他們打麻將的機會，可以說說笑，teasing each other，互說近況，蠻不錯！現在各有各忙，打麻將的次數已少了很多，以前每星期一至兩次，現在一個月一次，有時一次也沒有．其實最忙只是其中一隻腳屎先生，成鬼日話唔得閒，又要踢波，又話約左人食飯，係度扮忙！又無拍拖，都唔知啲乜！到人地唔得閒，佢又得閒，成鬼日要人就佢！黑人憎到死！話分兩頭，其實佢都係一個大好人黎，打麻將的時候被我們勁鬧（贏又鬧佢，輸又鬧佢）都係笑笑口，永冇黑瞼！ 打麻將至夜深的時候，手腳開始慢下來，疊牌時，被活跳C寸了一句，話如果殘奧有疊牌比賽，我實攞冠軍，頂！平時手腳最慢嗰個係佢，佢一時唔偷雞做保長，一百步笑五十步！嬲得我呀！即時打醒精神，豬死佢，哈哈！是晚戰績－我和活跳C輸！



＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊


今晚約咗好友兼波友們（車厘子，大N和好友So）吃生日飯，本來是去中環Watermark，但好友So說Watermark唔抵食喎，我跟大N同一反應是Watermark都應該真係好貴，因為好友So一向都很豪，很捨得花錢吃，若她說唔抵，都是不去為妙！（但不明為何她不在車厘子提議時說，位都訂埋，今日下晏先講，豈有此理！），之後佢說可能來不到，因明天要交工課俾老闆，咁我問用不用改期，最後佢為免掃興決定來，說快吃再返公司做野（好感動！），便提議去IFC H One，我當然無意見啦！起初我以為係Harlan's，去到後才發現不是這間，打俾車厘子問，原來係四樓！之後問番個經理Harlan's同H One有什麼分別，佢話係同一個老闆，但基本上已是自負盈虧，各自修行咁話！佢介紹我地下次來可以試下印度菜，個廚師喺印度皇宮做，重金禮聘請番嚟，聽後大Ｎ做了個怪瞼，因佢最憎食印度野，佢話有陣臭弧味喎！
點餸的責任落在好友So上，佢叫了一枝白酒，每人三隻蠔，一客意粉，Rocket Salad，一客魚，白酒蜆．因為好友So趕住走，每款食物吃了一點便走．待留下的我們包底！正餐後，我們更點了甜品；一致認為所有食物都好好味！雖然貴了一點（大約＄２６００），但值回票價！ 車厘子，大N和好友So，多謝晒！

好 pro架，點菜時，個經理會拎住塊黑板去你張枱度介紹the chef's creation.



左：餐前麵包＋白酒
右：蠔三隻(from top in clockwise) - Tasmina, US, France，我比較喜歡Tasmina



左：送嘅Hand sliced San Daniele ham
右：rocket salad


左：Home made Fettuccine w/Italian calamari "Spillo", baby scallop => 好味！
右：Sauteed imported clams, garlic, parsley and white wine sauce - 好鮮甜!


左：Jet fish cartafata，好特別的煮法，用張類似保鮮紙的東西包住焗
右：剪開後，原本裡面仲有青口同蜆，難不得咁鮮甜，我連啲湯也不放過



甜品：
左：Home made Souffle - Ginger favor Excellent, nice foam. come with lemon sorbet and vanila seed milk
右：Mama Tiramisu (forgot the name) - unlike traditional Tiramisu. The nut chips on top is very tasty.


左：Melting Chocolate cake - above standard but no surprise
右：又係送嘅－ White chocolate cake with mixed berries sauce.



Inside the restaurant :窗口有個無敵大海景

生日快樂!!

今天是本小姐的生日，心情特別好，早已約好我的P先生今晚食飯，更開心及驚喜的是今早收到他送的花！

另外，同事雪莉整了個生日蛋糕給我 ，她預先問我想吃什麼，我選了我的至愛－綠茶豆腐蛋糕！很好味！最攪笑的是同事電車Ｔ送了張美心月餅卷當我的生日禮物，咩事先，我又唔係中秋生日，我罵他好行貨喎，擺明是Vendor送啦，算，照殺！（我好Cheap!），但叫佢換埋俾我，我懶得排隊換！！

雪莉整的綠茶豆腐蛋糕，賣相不錯，味道也很好！


最失望的是爛gag哥同馬姐居然忘記咗我生日，等咗成日都收唔到佢地的電話同SMS，差唔多收工時，終於收到爛gag哥的來電，閒話家常了幾句，他想收線之際，我忍不住問佢有冇其他野跟我說（我以為佢扮野），佢反問我要講乜！頂！佢真係唔記得！嬲得我呀！！炳左佢幾句之後收線走人！我決定今年佢地生日我會扮唔記得以涉我心頭之忿！！哈哈！！隔了不久，便收到馬姐的來電及肥仔的SMS，肯定是爛gag哥通風報信啦！！

晚上，P先生喺City Super買了蟹，刺身同日本黑豚肉回家吃．吃罷蟹＋刺身已八成飽，P先生還煎埋黑豚肉，很滿足，很豐富呢！多謝晒！

對P先生什麼要求也沒有，只要是他可以陪多我一點，只要是他為我做的，什麼也可以了！

銅鑼灣翠園

是日好日，今早十時要去庵堂拜神，拜爺爺嫲嫲，公公婆婆，阿媽很早就約定我．拜完神後，仲有齋食，咁早（對我來說）邊度有胃口呀！吃了兩碗白粥便算！之後便陪阿爸去佐敦拿耳機，拿完３時左右，今晚約左朋友去銅鑼灣吃飯（又係我的生日飯），中間有個空檔唔知去邊好，行街又驚趺錢，諗諗吓不如返工司做嘢（嘩，好變態呀，咁有事業心，其實係想清埋啲手尾）．

個朋友問我想食乜，因為做緊野，冇心情諗，叫佢決定呢，佢永遠都想坤我去上環皇后街熟食中心，但我包拗頸，每次都唔肯去，最後去了翠園，友人話我好似啲老人家，喜歡上茶樓食飯（因上次同佢食晏，我又提議去翠園），大佬呀，翠園啲野真係唔錯嫁，幾好味呀！兩個人叫了六個餸，咁多野，當然食唔晒啦，唔想浪費食物，我便把個飯同鎮江肉排打包留番聽日食（又食又拎）．埋單６六百元有找！


鎮江肉排（＄８８）


籠仔蒸蟹飯（＄１６８）


蛋白炒涼瓜（＄７８）


梅菜鴨脾（＄４８）

鐵板义燒（小：＄５０）

海哲頭（＄５５）

象皮，祝你生日快樂！

今早上班途中收到象皮個sms，內容是”Happy Birthday to me pls :)”，立即笑了出來，係呀，今日真係佢生日，喂大佬，我無唔記得喎，唔使提我呀！Send SMS去祝人生日快樂就有啫，叫人祝自己生日快樂我就第一次見， 爆無聊！！以下是ｓｍｓ對答：

象皮：Happy Birthday to me pls :)
va ：I remember lar. Send u a bday kiss... haha... wanna die?! (想晨早嚇吓佢）
象皮：Thank you. Thats wat I need. Some small but encouraging!!
va : (xyz!x! 無言以對，唔夠佢玩）


*************************************

講起象皮, 不經不覺已認識了大約十年 , 當年他結婚不久 , 現已是三小朋友的父親 ! 雖已是三小朋友的父親 , 但仍舊是那麼低能! 正所謂"江山易改,本性難移! 我們由同事 ->舊同事 (他離開)->同事 (他rejoin) ->舊同事(我離開) ....正因為佢咁低能 , 同佢特別friend , 趣事也特別多 !


趣事一：
我倆會喺office hour扮開會匿喺meeting room 偷食芒果！（以前的事，現在唔敢），有次仲叫埋個新丁（現在是我的好友馬姐）一齊食．．．

趣事二：
舊Office要行條長命斜，有一朝早返工途中，佢見到我喺佢前面，但轉咗彎突然唔見咗人，但兩分鐘後，又見番我個頭出現，番到office佢問我頭先做乜，我話”又仆街囉”！佢話佢未做夠一年，已經見過我仆咗3次街，唔知點解次次仆街都俾佢見到！

趣事三：
佢問我一唔一齊食晏，我話要減肥唔食，食完晏後當佢去廁所喺後樓梯見到我，問我做乜行樓梯唔搭lift，我話要減肥（但我手拎住罐可樂），我就見佢頭好多個問號，應該諗緊”減肥同可樂”的關連．．．（我明明記得是diet coke，但佢死都話係紅coke)

*************************************

另外，今晚會跟Ａ記的舊同事慶祝我的生日．但等到晏晝都未知去邊到食，之前給了兩間餐廳俾我擇，我話冇所謂，叫口水Ｗ決定，點知佢無咗影（可能工事繁忙啦）；而其他人呢又唔多肯做安排／訂位呢啲麻煩野（平日唔係口水Ｗ做就係我做），最後我忍唔住，上網搵電話（因口水Ｗ話搵唔到個電話喎，藉口！），訂埋位兼通知埋佢地！頂！頂！我想喺個email度講埋我會負責去買埋蛋糕，但驚俾人寸話佢地無諗過買蛋糕俾我，都係唔好提． （p.s. 最後我當然有蛋糕食啦！哈哈）

是晚我們一行十人去了三希樓滿江紅，主打是川菜，點了水煮魚，牛肉豆腐腦，川子雞（呢個最好味），夫妻肺片（是我叫的，但忘了是牛肉，唔食得），蒜泥白肉，蓮藕餅，皇帝菜，胡椒蝦，流沙飽（大家都以為係豆沙飽），豆腐花．．．等等！食物大致上都很好（忘了影相），比四姐做得更好！唯一缺點是比較隔涉，雖則喺中區，但位於花園道附近，唔搭的士去都唔知搭乜；飯後照舊去Dicken's Bar 飲嘢啦！象皮仲帶埋老婆同兩個細路黎Join我地，不過忘了小朋友唔落得酒吧，最後我同阿米唯有喺酒店個大堂同兩個細路玩！

當晚仲收到豬冷te送俾我的生日禮物（是我今年收到第一份禮物），是幅青蛙十字繍掛畫，係佢親手造，好感動，多謝豬冷te！


另外仲有大N送的日本手信，左邊那份好有心思 ，因我們是羽毛球波友，我諗我另外兩位波友都會收到這份禮物！多謝晒！

Monster Sushi - Langham Place

因吳彥祖的原故，一直都想去Monster，但苦無機會，一來我實在討厭旺角無時無刻都咁人山人海，二來聽聞要等好耐；碰巧今日約咗舊同事瑪莉，而同事Ｋ放假，可以叫佢早啲去攞位，終於有機會去食；同事Ｋ遲了一點到，跟我和同事Ｓ一樣七時前到達，幸好不用等位．我們四人點了：

鰻魚玉子燒－好味（可能我太愛吃玉子燒了）
玉子燒－好味
帆立貝壽司－帆立貝很大，跟峰差不多，正！
海謄軍艦 －d 紫菜 淋哂，海膽唔夠鮮甜　
蟹子Salad－這個弱了點
帆立貝燒－好味
蝦膏壽司－賣相唔得，pat蝦膏好似pat屎咁，味道一般
雞軟骨及大蝦天婦羅壽司－不過不失
蟹柳壽司－跟峰差不多，正！
清酒煮蜆－正常，不過不失

仲有兩三樣，但忘記個名，而我又無食到，因已經好飽了！





基本上食物有水準，跟峰壽司差不多，我很喜歡佢啲飯，不是普通的壽司白飯，是微紅的，帶有梅子味，幾特別，據聞是”江戶前”的特式．但若要我等個幾兩個鐘呢，我又覺得唔值！

食飽後，再去滿記食甜品（頭先明明話飽，唔知點解又食得落），點了榴槤＋涼粉的東西（好吃，但忘了它的名字）；之前食壽司已經食到很飽，食埋甜品，飽上加飽！！食到太飽有些內疚，最後決定由朗豪坊行去旺角東鐵站．


後記：
經過旺角地鐵站，發現一個現象，佢除咗是一個地鐵站之外，仲係網友們交收的地方！霎眼一看，最少超過廿個人做緊／等緊做呢樣嘢，犀利！