霸王餐?!

搬左去觀塘冇啖好食，隔離熟食中心啲魚旦爆難食，成粒粉團咁，應該叫粉旦囉，咬了一口已經要放棄；連我的至愛杏花樓既鎮江骨菜飯都難食過人，死未！今日仲勁，食霸王餐添！選址是apm既＂家傳戶曉＂，一行四人，有我，祖兒，雪莉及金同事；我們選了四人套餐，只需用＄２６ｘ，好似好抵食，有兩個冷盤（醉豬手＋卥豆腐），四隻小籠飽，赤小豆粉葛湯，唔記得乜乜炒黑豚，類似回鍋肉的東東，煎大蝦拼伊麵，清炒豆苗，仲有甜品！（嘩嘩嘩，依家寫低先發現原來好多野，食晏都食咁多，明白點解減來減去都仲係咁肥！）
言歸正傳，我們１２：４５點菜，大約１３：００頭三樣已到齊兼食埋，等了差不多十分鐘便開始追單，因我們早了出來吃飯，要１３：３０前離開回公司；追呀追，到１３：２５才來那碟類似回鍋肉的東東，吃罷我們不等了，便著侍應叫經理來睇下點計數，豈有此理無人理我地；之後金同事帶頭離開，我們便跟上；那時才有人攔住我們；祖兒便跟他們周旋，便著他們扣除未到那些食物埋單，在旁的金同事不憤說為什麼我地要俾錢，是他們做得不好浪費我們的時間還等了那麼久，我跟祖兒都覺得始終我們都食了人家的東西，是要俾錢的；但張單出來竟然貴過個套餐，要＄２９ｘ！你話係咪黐線！我們當然唔肯俾啦便跟他們理論。。。可能佢地都知過份，最後那個經理才說不用錢了！
最”慶”是在周旋期間，見到有幾碟豆苗出，但都唔係送往我們的檯，好明顯是漏了單，那部長還解說叫套餐是要等耐一點！難道叫套餐唔使俾錢咩？！荒謬！！
後記：我和祖兒笑說我倆終於可洗脫”惡人”呢個名，因發現平時不多作聲的金同事及雪莉才是最惡的！我幾時都話我是最和藹可親架啦！哈哈！

Ｆａｃｅｂｏｏｋ照片

近日發現友人們喜歡把自己的結婚照做Ｆａｃｅｂｏｏｋ　ｐｒｏｆｉｌｅ相，本人每次看畢都會勁起雞皮；男的個人照還可以，女的那些嬌柔造作或扮鬥氣的合照，爆恐怖！煩請把相片放進私相簿已足夠，至少人們是有準備地去看才進去吧！（實不相瞞，你們的恩愛照看一次已足夠，絕對不會重複看，如果有人話會，你都驚啦！）奈何你又是Ｆａｃｅｂｏｏｋ活躍之士，苦我每次打開Ｆａｃｅｂｏｏｋ時，都有你的ｕｐｄａｔｅ／ｒｅｐｌｙ，硬生生地食了幾野！想點先？！簡直是疲勞轟炸！ＯＫ，你有權放你喜歡的相片，與我何干！但既然你放得，我也有權去評頭品足呱！為什麼不可以放張正正常常，自自然然的生活照呢？！

另一友人很喜歡雜亂無章地ｐｏｓｔ啲相上去，勁ｏｕｔｆｏｃｕｓ或重複既好心就唔好放上去啦，ｆｉｌｔｅｒ下好喎，有無理睇既人的感受架！

Ｐ的生日

上星期三是Ｐ的生日，佢成日叫我唔好嘥錢買野俾佢，而且佢話佢乜都有喎！所以我都冇特別諗買乜禮物給他，本來想買Ｃｌｉｎｉｑｕｅ　Ｓｋｉｎｃａｒｅ，佢又話仲有存貨；最後我喺ＧｉｏｒａｎｄｏＣｏｎｃｅｐｔｓ見到件衫好啱佢，便買來做佢的生日禮物。

之後再到ＣｉｔｙＳｕｐｅｒ買野回家＂豪＂食－買左六隻蠔，兩隻車厘蜆，翡翠螺，壽司同帶子剌身！本來想買即食法國麵包蟹，但無得買，失望！


Ｐ，祝你生日快樂！（我知你今年生日不會太快樂，希望不開心的事快點遠離你）

Ｄ－ｍｏｐ的ＳＬＹ羽絨褸

星期六，病住同菠蘿油行街，又跌錢啦！喺Ｄ－ｍｏｐ睇中件ＳＬＹ羽絨褸（ｍｏｕｓｓｙ姐妹線）；一入間鋪搵菠蘿油時，已被這件褸吸引，覺得個款好型，菠蘿油當然慫恿我試上身啦（都唔明點解我買野跌錢佢咁開心，收錢果個又唔係佢），試上後不得了，勁鍾意，平時穿羽絨褸會立即變左米芝蓮，呢件唔會喎，好收身架！但望一望個價錢便卻步，要三思！便着女售貨員幫我ｋｅｅｐ起俾啲時間我諗下（因剩番一件新）；菠蘿油又帶我去睇佢之前睇中件皮褸，試上後又ｏｋ喎！價錢不是很貴，＄９００多元！不過我不大喜歡皮褸陣味，可以留待再平些才入貨。。。還是心思思掛住件羽絨褸！最後坐低飲杯野，諗呀諗。。。我一件羽絨褸都冇，羽絨褸一件可以頂好耐，一件好既羽絨褸差不多呢個價錢，都唔係好貴啫，而且上年又冇買過褸，都唔係好過份啫（ｏｋ，永遠給自己十萬個藉口去買野）！加上我的好友永遠都＂實扑＂我買衫的決定，而女售貨員又好窩心地在差不多收鋪時打俾我，問仲需唔需要幫我ｋｅｅｐ。。。最後當然。。。（我真想問自己係咪發左，又買野，香港好彩有我咋！！！！）

p.s. 之前仲睇中左個Ｃｈｏｌｅ皮袋呀，點算！真係賤物鬥貧va！

Calvin Klein

吃完飯後，途經九龍塘又一城，經過Calvin Klein，發現還未收鋪便入內逛逛；早幾日，菠蘿油便在Calvin Klein敗了一對鞋，那時半價，還說看中另一雙；依家啲鞋做緊四折，菠蘿油說買早左； 而我呢，被奸人所害，敗了兩對添！

左邊的是黑色漆皮（折後＄６７６）：我發現我是無黑色鞋，這對高度剛剛好，兩吋左右，我喜愛它後跟的設計，有一條印上ＣＫ的銀邊，令這雙普通的黑鞋變得不平凡！讚！


這雙灰色的（折後＄８７６）：我也是無灰色鞋，鞋跟三吋，穿上後腳型很靚（全是藉口吧）；可以留待來年春夏季穿！

只是覺得很抵，兩雙加埋只需用＄１５００左右，Calvin Klein喎，雖然不是made in Italy，但平時買一對都唔得啦！

九龍城創發

星期四，車厘子要去九龍城整牙，約我去九龍城陪佢食飯。我都唔執輸，申埋菠蘿油一齊去！去左創發打冷，食物水準依舊；要了條大眼雞，墨魚拼鵝腸，大地魚炒九菜花，煎蠔餅。

好大條啊！盛惠一百蚊！魚肉結實，無霉！


墨魚拼鵝腸：墨魚夠爽口，是白色的，不是那些染到橙色咁人工化！


大地魚炒九菜花： 大地魚同九菜花都是我的至愛，兩者份量啱啱好！

煎蠔餅，其實我不大愛吃蠔餅，很怕那些漿多過蛋及蠔，煎的時間不夠，咬下去滑潺潺，好核突；但這裡煎的時間恰好，外面脆卜卜，裡面好多蠔，沒有滑潺潺的口感！

免費送了鹵水花生及反沙芋；反沙芋像是其他人客叫錯了，侍應拿過來問我們要不要，是免費的，每人一條；熱辣辣，好好味，但吃畢整條後好滯！

埋單三百八十元，不設加一，也不是很貴！

偷懶日

星期二，Ｐ說工作令佢mentally sick，要請日假抖抖，咁啱我在他家，便一起偷懶（一日咁多啦）吧！一早起來，盤算著怎樣善用多來的一日假，去看戲嗎，又無乜戲想睇，我提議去的我幫襯開的ｂｅａｕｔｙ　ｓａｌｏｎ按摩（因我想快點消滅晒我手頭上的ｃｏｕｒｓｅ），但ｆｕｌｌｙ　ｂｏｏｋｅｄ！最後選了在家抖至三時便去了附近的按摩店！選了泰式，那個按摩師好似耕田的，超大力，手勢不錯，想舒活筋骨就啱，若要舒適享受就不能，整個過程我叫了多次細力點，自問是受得力的，但都頂唔住！

是日晚餐，Ｐ弄的肉骨茶＋馬拉盞撈烏冬。。。買了塊豬骨，加埋前兩日打邊爐剩餘物資－牛肉及白蘿蔔，唔使浪費食物！

Ｐ弄的肉骨茶有水準，好食過上次係沙田魚尾獅的肉骨茶！勁呀！

又打邊爐！

星期日，Ｐ忙完後便提議一起吃飯，他不喜歡出街食，便去了他家打邊爐（沒錯又係打邊爐，他的至愛），當然是他負責買及準備食物啦，我就只需買豆腐便可以了！
今次在街市買了海鮮及蔬菜，當然不像ｓｏｇｏ咁貴啦；那些蠔購自百佳，標籤說也是日本廣蠔，但不及上次喺Ｓｏｇｏ買的咁好食，價錢相若；豆腐是我在ｃｉｔｙｓｕｐｅｒ買的，晚了，只剩下絹那款，不夠絲咁滑，但一樣豆腐味重！那些蜆主要令湯底甜些，蜆肉太少細了，不吃也罷；蟹是生猛的，不鮮甜才怪！又食到飽晒！又係Ｐ善後！我真係好懶呀！（其實係佢爭住做咋，唔關我事架）哈哈！

娛樂頭條

近日娛樂版的頭條，多數是以連續劇居多，先有大劉兩女爭風吃醋，其後嘉享新婚由籌備至完婚，各已霸足一個星期；今次倪才子偷食新聞，又不知擾癢多久。。。

對前兩則八卦新聞不感興趣，大劉好一句女人有錢就身痕的＂偉＂論本人極之反感，呂小姐爭坐正發表正印宣言只覺得好傻，你跟官咁耐都唔知官姓乜咩，走去挑戰你個米飯班主，博炒呀？！

嘉享愛得痴纏，從拍拖至今，街頭恩愛照已看到有點膩，多到有點假添，慶幸終能開花結果！好一對俊男美女！最想知是他們之後是靚靚得靚，還是靚靚得醜呢！

倪才子偷食也不是第一次，唔知今次玉女敏原唔原諒佢？不明倪才子為何會咁蠢，明知蘭桂坊是狗仔隊聚武之地，也夠薑喺大庭廣衆公然親熱，阿生，好唔俾面喎！真的是酒精累事嗎？還是別有用心，借用傳媒把口！或者，男人那話兒充血時，同時也＂沖＂昏了頭腦，沒有了思考罷！

Wings bar and restaurant

上星期舊公司發生咁大件事，星期五便約了舊公司的同事們（有些已離職）食飯，出來輕鬆下咁啦；波褲提議去Wings bar & restaurant，位於銅鑼灣Sogo對面上樓；反正未去過，試下也無妨！當日才訂位，只剩下ＶＩＰ房，最低消費＄１５００，波褲（媽記喺自己個blog度咁叫佢，笑到我肚痛）問我們有無問題，我們七個人（大Ｎ，阿米，媽記，莫探長，波褲，口水Ｗ），飲埋野都差不多呢個數，照去；食物款式不多，而且食物的大小多是一人前，細得很，味道就ｏｋ啦！叫得Ｂａｒ，個drink menu 有番咁上下長，我們叫了很多cocktail，全部都酒味較淡，易入口，但不太適合嗜酒人士了！
差不多每人都要了一杯Openrice推介的Blueberry Sour，其他的有：－Lychee saketini ，Punky berry，Berry Collins, 紅白酒Sangria各一jar，媽記至愛Margarita，Virgin Daiquri，Mango Mojito，Berryberry smoothies，仲有青島！　

ＶＩＰ房內的水晶吊燈＋銅鑼灣鬧市景

白酒Sangria

Buffalo Wings－不是傳統美式製法，跟Buffalo Wings扯不上任何關係，應該要改名！

Calamari－細細粒，等人齊及佐酒佳品！

Parma ham pizza &Salami pizza－薄薄的，脆卜卜，好難不好食

Mushroom Asparagus Risotto－creamy得來唔膩，但唔似用意大利飯來整，因飯身較細粒！

Baked Oysterｘ２－＄４８四隻，質素同價錢成正比，ＯＫ啦！

Cod Fish－太細啦，物以罕為貴，只食得一啖，好想食多啖！

（有人分少左一份，攪到阿米冇得食，剩係食魚下面塊薯茸餅！）

白酒蜆肉意粉－除了四大隻蜆外，還有多隻細粒去殼撈在意粉裡面，又係食得一小住，食不到白酒味，但味道也不差！

註：輯相係咪影得好靚呢，攝ｂｙ波褲

後加兩客燒雞翼給遲來的楊公子！大家嘻嘻哈哈，呻下笑下，由七點半hea到兩點，最後埋單二千五，嘩！我諗剩係飲料已佔三份二（一杯大約五，六十蚊）！是晚莫探長請客，真係多謝晒！

另，Wings bar做緊＄１８８四小時任飲，飲三，四杯cocktail已回本！

走了。。。

姐姐的老爺前幾日過了身，是癌症末期，由發現至離去是兩個月內的事；據醫生說癌症也分三種，而姐姐的老爺的是最惡那種，擴散得最快的；醫生預計只得三至六個月的日子，幸好姐姐叮囑兩老快從上海返港，若剩下姐姐的奶奶一人處理不知怎算！
來得突然，姐姐的奶奶看著老伴離去，盡管平時有多強，一時也接受不了，人也崩潰了；而姐姐和姐夫當然不開心，但往好的一面看，沒有給癌病魔折磨至痛不欲生，叫生叫死，走得也算是安樂了。。。

又是榮川

又是榮川，不過今次是來吃午餐！在銅鑼灣工作的日子只剩兩個星期，真係要食得幾多得幾多，大家都覺得觀塘無啖好食（是一處鬼地方添，我加ｇｅ）！
一行五人殺上榮川，午市也是坐無虛席，幸好有Ｂｏｏｋ位！

祖兒的豚肉烏冬－＄６８（是最抵食及好味的），黑豚肉好正，豬骨湯底也好夠味！祖兒略嫌烏冬淋了點！


我的咖哩黑豚烏冬－＄７８，烏冬夠滑及彈牙，黑豚肉好正，不過咖哩湯底太濃了！

雪莉的薄燒牛肉

金同事的Ａｎｇｕｓ牛肉－普普通通喎！（他的攝影技術有待改進）

史堤的魚生角切飯－不過不失，海膽少了點（我覺得）

總括來說，午餐只是一般！價錢大約＄６８－＄１２８（加一另計）

巨人倒下的後遺症

星期二，舊舊公司一連兩日開始裁員，中不中籤的都要面聖！一日前已事先張揚，電郵預約各同事面聖時間，不知是人事部或高層的決定，但這個安排確是殺人，有無事既都俾佢嚇餐飽，有些人仲要嚇足兩日，真是人都癲呀！我情願即時派彩，也不要這樣等，等待壞事降臨最是磨人的！大佬，依家唔係派Ｂ仔或公報升職名單呀！無Ｂ仔，仲有份月薪呀，無職升，咪緊守現時的崗位囉！但依家講緊無左份工，仲要喺呢個艱難的時間，你話點等！最後埋單無左一半人，我以前坐嗰條街（有十個位）只剩下肥精門神一人 ，悲！很多以前共事過的人也不能幸免！有兩條ｔｅａｍ更是全軍覆沒（我曾在其中一條ｔｅａｍ工作過多年，心酸！）

初出茅廬的我，第一份工便進了這間在業界排第一名字響噹噹的公司，一做便是九個年頭，感情也很深厚；際遇雖是平平，但跟同事關係十分好，他們都很照顧我，也是我待在這公司那麼久的原因；雖已離職，但聽到這個消息後心情也不好過，也為一些老朋友往後的日子擔心，有的是經濟之柱，一家大細靠晒佢，現時個市咁差，揾番份工又談何容易！他們多數是老臣子，年資超過十年，大多諗住同佢做人世，有份穩定的收入！弄至這樣田地，有多少人會預計到，唉！

另，它的倒下，影響的何只是它的員工或投資者；事實上整個行業也給它拖累了，這個行業最注重的公司的誠信；連規模咁龐大的機構也差點要倒閉，你話客戶對其他相對較細的同行的信心會怎樣；失去了信心，自然也不會把錢放在你袋，那生意更是難做呢！希望這段艱難的日子快點過！

自家火鍋

星期五開始轉冷，約了Ｐ先生吃晚飯，而他不想在外出吃，便提議去他家打邊爐，因我們很晚才決定，街市早就關了，便到Ｓｏｇｏ的Ｆｒｅｓｈｍａｒｔ買食物，我早到便隨便逛逛，嘩，啲菜貴到不得了，是日本入口的原因嗎，一個生菜賣成＄３０蚊，半個白蘿蔔要＄１１蚊，我便不敢輕舉妄動，等Ｐ先生來到才決定，費時俾佢鬧我傻，咁貴都買，因我自己都覺得有點貴（我發現近來比以前真的慳了點，以前不理價錢，想吃或鍾意的便買，當然是能力範圍內；但現在會覺得貴或不是必需品便打消念頭）；點知佢來到居然照買，無噪話貴喎，奇！Ｆｒｅｓｈｍａｒｔ沒有太多火鍋材料選擇，最後買了些肉，蔬菜，急凍蠔便打道回府了！

Ｐ負責所有野，由準備食物至善後，也不用我幫手（可能嫌我慢手慢腳），我便繞埋雙手等食，食飽後睇電視，幾嘆！哈哈！

圖中，除了粟米及魚旦，其他全是購自Ｆｒｅｓｈｍａｒｔ。左起：

加拿大火鍋肥牛：＄４３。

日本軟豆腐：超抵，因限期將至，只售＄６，其他未到期要賣成＄２０有多，很滑，其實軟豆腐不大適合打邊爐，易爛，要很小心處理

魚旦：半斤＄２４，購自麵鋪，很彈牙

日本豚肉：＄４０多元，超過十片，肉質很甜，薄薄一片，淥久了也不會韌

日本急凍廣蠔：＄４０多元，忘了是８隻定１０隻，完全沒想到急凍會咁鮮甜，可比美美國桶蠔；正！

日本舞菇：＄１８一包，只是打開袋口已聞到好香，吃時很爽口，有香甜的菇味！

日本白蘿蔔：＄１１半條，不覺得跟本土的有什麼大分別！

圖外，還有和風湯底及那個＄３０的生菜，湯底幾特別，不像平時出街打的麻辣沙爹湯底咁悶；

而生菜很爽口，感覺很新鮮！

看似很貴，但其實比去酒樓食仲便宜，但食物的質素卻好好多！至少我知道食物的來處，而且購自ＳＯＧＯ有所保證！

公司的新玩意

這是公司新置的咖啡機，購自Ｐａｃｉｆｉｃ　Ｃｏｆｆｅｅ（好像要萬多元），可製多款不同的咖啡如Ｅｓｐｒｅｓｓｏ，Ｃａｐｐｕｃｃｉｎｏ，Ｃａｆｆｅ　Ｌａｔｔｅ；而咖啡豆也會用Ｐａｃｉｆｉｃ　Ｃｏｆｆｅｅ的，以後不用幫襯其他的咖啡店了，正！但有得揀，我情願留在銅鑼灣，也不要新的咖啡機（因這部咖啡機是為了搬去位於觀塘新公司而設的，一想起月中的搬遷就勁灰！！）


另一新玩意便是這部Ｂｌａｃｋｂｅｒｒｙ　Ｂｏｌｄ了，據聞是最新款的（市價是四千多元）；星期五收到這部＂黑梅＂，未有機會發揮它的功能，因暫不用出差，而且通話功能不在服務計劃內，只可用公司的網路上網（即是有等於冇，因很多ｗｅｂｓｉｔｅ也ｂｌｏｃｋ了），所以對我而言，只是覺得很重，因要拎多部電話出街。唯一好處是我買手提電話的計劃可以暫時擱置，慳番啲錢！



只是覺得公司很有錢，在其他公司正在ｃｕｔ　ｂｕｄｇｅｔ之時，公司還有多餘錢去添置這些奢侈品（雖是之前已批的ｂｕｄｇｅｔ），但始終在這錢根短缺，經濟不景的日子，真的要慳得一蚊得一蚊，希望公司這位大花筒唔好再咁大使，慳住用；費時最後ｓｕｆｆｅｒ的是我們這些小職員！（到時要裁員減薪就不好啦）

窩心的暖包

前幾日約左爛Ｇａｇ哥食飯，原意是借用他的腳箍（因隻豬腳仲痛），取後發現不適用便直接交還給他！雖然腳箍用不著，他還準備了冷暖包給我敷腳，很窩心啊！
我選了沙田魚尾獅（我成日都坤佢去沙田，方便我麻），想試它的肉骨茶，因上次跟爸媽在此食飯時沒有食到，今次終於可以食！結論是＂把鬼＂－肉骨茶材料欠奉，藥材味很淡！Ｐ先生造的好吃很多！爛Ｇａｇ哥請客，多謝晒！

新景象

在屋企樓下閒逛，發現了兩個新景象；第一，地產鋪由盛世時的四間縮減了兩間，可見現在樓市銷情如何！第二，商場外的平台加添了多張枱及椅子給人們休息，旁邊有多間小食店，人們也可在這裡進食買來的食物，多寫意！這個新設計不錯！ 揾日也要下來坐坐！

新工作

新工作開始了，轉左ｒｏｌｅ差不多兩個月終於有個實質既ｐｒｏｊｅｃｔ做下；今日同啲高層開會，起初還有些擔心，怕自己準備不足，ｋｎｏｗｌｅｄｇｅ不夠，幸好之前的準備可以撐場面，應付下來！希望老細在往後的日子能清楚地給與方向（佢有老人痴呆存，反應總是有點慢），ｐｒｏｊｅｃｔ可以順利地進行！

風聲鶴唳

金融海潚沖擊下，全球經濟下滑，進入冰河時期，打開報紙或是電視機，滿是公司裁員的新聞－瓜皮銀行全球削減五萬名員工，獅子銀行炒人一浪接一浪；人心惶惶，唔知幾時輪到自己，灰爆！我有幾個ｆｒｉｅｎｄｓ係獅子銀行做，都替他們擔心；攪到我上個星期無心機出街！諗諗下，係你的就係你，都無得避啦！要Ｔｈｉｎｋ　ｐｏｓｉｔｉｖｅ，俾多啲正能量自己，開心啲好過！
昨晚跟蘇ｇｏｏｄ及佢細佬活跳Ｃ去火湯滙打邊邊，席間談及我的舊公司情況（即是活跳Ｃ現職公司，情況十分嚴峻），周圍傳出很多舊公司裁員的消息，但都唔知係堅定流，有的說年尾，有的傳今個月。。。款式包羅萬有，鑊鑊新鮮鑊鑊金！最好笑是，活跳Ｃ問蘇ｇｏｏｄ取２００９年的座檯月曆，蘇ｇｏｏｄ揶揄他話＂你就黎俾人炒啦，要個座檯月曆黎做乜，放係屋企呀！＂，咁講雖則殘忍，但十分啜核，到肉，笑鬼死我！你話呢啲ｆｒｉｅｎｄ幾無人性呀，哈哈！不過佢都係講下笑，苦中作樂罷了！其實蘇ｇｏｏｄ都驚架，佢話佢公司正準備屠殺名單，隨時ａｃｔｉｏｎ咁話，而佢是負責ｄｉｓａｂｌｅ員工的ｌｏｇｉｎ　ａｃｃｏｕｎｔ，佢感慨地話就算好彩自己無事，若見到自己ｆｒｉｅｎｄ榜上有名或看到身邊的同事要執野走，你也不會好過！希望啲陰雲快散，青天快啲來！
，

榮川

今個星期，一連三日都出左街癲同食飯，星期一，陪菠蘿油行街買衫，最後自己都買左件黑色衫及一條黑頸巾（都係時候要幫手振興香港的經濟），都唔明點解個間鋪頭個價錢仲企得咁硬，全年不做特價，一件黑衣要賣三百多元，痴線（但我都買左喎，仲痴），之後去左老地方飲野；

星期二，約左蘇ｇｏｏｄ去榮川食飯，想去榮川好耐架，成日都ｂｏｏｋ唔到位；食物水準之上，有創意，細細碟，可以試多啲唔同食物！兩個人叫左十樣野，飽到死！

左：餐廳的裝潢模仿築地魚市場，牆上掛滿大字牌仿如活動餐牌

右：先來兩杯＂小＂啤！小小的酒杯冰鎮奉上，保持溫度。細細杯，不消一會已喝完

鯛魚剌身，基本上我不吃魚的剌身，但既然來到，唔試下好笨實；薄薄一片十分鮮味（我最怕切得厚厚的魚剌身，放入口滑潺潺好恐怖），配上旁邊的松露油更是神來之筆。只賣＄３８大元，勁抵！

左：漬物盛。我最鐘意食蒜頭及喬頭

右：唔記得乜東東生蠔。製法特別！

左：天氣轉冷，叫個熱ｓａｋｅ暖胃

右：汁煮鮑魚，這個一般，不夠入味

左：活生蝦 ，睇住佢係魚缸游水（好殘忍呀），十分新鮮！＄４８＠

右：燒魷魚，不過不失，無甚特別


左：關東煮，好入味但不會太鹹，我們還後加五片蘿蔔

右：燒苙魚（即是石九公，成百六蚊一條，俾老爸知道實俾佢鬧死），魚肉燒後仲滑，但沾在鰭上的鹽太多太多，夾時很易沾到，食入口爆鹹！要投訴！


餐後免費奉上雪糕，那個柚子雪糕很好味，酸酸的可助消化，因之前的投訴，我們每人贈多一球，埋單盛惠＄６９０，也划算吧！

白頭髮

今朝起身梳洗完後，搽緊面仲係呆下呆下之際，有驚人大發現呀！俾我見到近額頭有條白頭髮，幾大檸樂！個人立即醒晒！即刻攞把較剪出來消滅佢！望望下，原來得半條，近髮根的一半還是黑色的，我自我安慰地想應該是啲護膚品影響到（但我最近都無搽美白之類的東西），若不是的話，無奶油前半是白色，後半是黑色！一定係咁，無其他原因！現實點，應該是最近用得腦多呱！

戇狗狗

今午，約了爸媽去吃午飯，本來想去翡翠小籠飽（因老爸喜歡吃小籠飽），後來只見媽媽一人，她說老爸不來，原來今天是跑馬日，他老人家要刨馬仔；只剩下我倆，吃也不多，便轉地方去了隔壁的ＳｕｐｅｒＳａｎｄｗｉｃｈ；昨晚吃了太多，今早還飽著，我只要了份ｃｈｉｃｋｅｎ　ｃａｓｅａｒ　ｓａｌａｄ；媽媽點了個吞拿魚焗薯！

她還帶來今天一早煲的愛心湯一大碗－西洋菜鴨腎栗子湯；不知怎的，我很喜歡吃煲湯的瘦肉，貪佢夠硬，要趙！


晚上，馬姐，肥仔，沙拉及麗莎他們去左屯門蝴蝶灣ＢＢＱ；我預早已說不ＢＢＱ，因昨日及黎緊的星期五都要ＢＢＱ，不想一星期ＢＢＱ三次，但仍會去ｊｏｉｎ他們，因為很久已沒跟他們見面，算是聚一聚！爛ｇａｇ哥也一樣，佢話熱氣喎，不ＢＢＱ但仍會出席；攪掂晒啲野後，六時許便出發，平時聽馬姐及Ｚｏｏ２說ｗｅｅｋｅｎｄ會去沙田行街，心想應該不是很遠的，又不用轉車，最後等車加坐車加埋等爛ｇａｇ哥用了個半鐘，頂！到了屯門後還要轉車去蝴蝶灣，又用了差不多半個鐘才到達（剩車程要用兩個鐘有多），之後戇狗狗坐係度睇住他們燒烤，雖然也有跟他們聊天說笑，但感覺也是超無聊，勁白痴！總之就千萬個後悔！十萬個戇居啦！頂！！回程時，我跟爛ｇａｇ哥說以後也不會再做這樣傻事，佢都贊成！

大閘蟹宴

昨日去左西貢車厘子的家食大閘蟹＋ＢＢＱ，加埋菠蘿油及她的同事，一行十人；這個組合，一定是不醉無歸；未齊人，便在天台閒聊，喝住酒，曬住月光等食，人生一大樂事（如果Ｐ也在，多好呢）！紅酒不是我那杯茶，我只喜歡白酒跟香檳，慶幸車厘子也多預備了這兩款；那支白酒很易入口，唔會太ｄｒｙ，不錯，不知不覺便喝了多杯。。。跟菠蘿油的同事是第一次見面，他們十分有趣及癲，第一次見面也沒有陌生的感覺，也傾得埋；我覺得他們跟我的同事很不同，可能跟工作環境有關，他們時常見人，招待客人，是比較活的一群，玩起上來是十分癲的；而我的同事平日大多數是對住部電腦，是較呆板同正經！

除了大閘蟹，比利帶來鹹豬手一大隻，自製味醂秋都魚及牛肋骨來ＢＢＱ，我不吃牛，不知味道如何，其他兩樣都很好味！尤其是味醂秋都魚，用來ＢＢＱ，十分香口惹味，味道很日式的！
吃了三隻蟹（原本我只ｏｒｄｅｒ兩隻，但因有人爽約，多了數隻出來），加埋上面東東，已十分飽，後加多兩杯薑茶及兩杯香檳。。。不一會便要嘔，不知道是吃，喝得太多胃子跟本容不下，還是溝酒的原故了。。。ｗｈｏ　ｃａｒｅｓ！開心便可以了！

今年第一次食大閘蟹，比往年遲了很多；對食大閘蟹的熱情已冷卻了不少！可能往年已吃了很多有點厭，加上健康的因素，都係小吃多滋味！

等食中，在天台上賞月，昨日是農曆十八，月亮仲好圓呀！














大家都很忙呀，忙著吃！














注意！椅背掛著的是我的嘔吐袋，好嘔心啊！

腳傷

早幾個星期打波整親隻左腳，不是太嚴重，諗住慢慢會好番便沒有理會它；點知到今個星期仲未好，落樓梯級時膝蓋便發痛，星期四放工後忍不住去睇跌打；那個跌打醫師我細細個就幫襯過（要用朱潔儀幫ｘｘ僱傭中心買廣告的口吻說），想不到十多年後佢還在應診，他現在多了個女助手，像是他的徒弟；可能我是女的原故，所以由這位女助手替我診治；她說沒什麼大問題，很仔細地話俾我知是膝蓋後的三角肌整親，其實我也不知那裡是三角肌，跟我說也是沒用的，可能佢見我頭頂滿是問號，她便指住那幅人體圖再解說一次；她說敷藥後也不用覆診，若想快些好便帶腳箍；即是好小事啦，但依家仲痛喎，咁點先？

我的＂美＂腿，哈哈！

偏偏喜歡你

另一首陳百強的情歌－偏偏喜歡你




愁緒揮不去苦悶散不去
為何我心一片空虛
感情已失去一切都失去
滿腔恨愁不可消除
為何你的嘴裡總是那一句
為何我的心不會死
明白到愛失去一切都失去
我又為何偏偏喜歡你
* 愛已是負累相愛似受罪
心底如今滿苦淚
舊日情如醉此刻怕再追
偏偏癡心想見你
為何我心分秒想著過去
為何你一點都不記起
情義已失去恩愛都失去
我卻為何偏偏喜歡你

無題

唔想寫野，今個月寫親的野全部都係啲唔開心事。。。

近排時常聽呢首歌，可能跟心情有關；突然發現原來陳百強的情歌咁好聽，咁噤聽！


深愛著您 - 陳百強
你說過愛在這一生裡
有過快樂與心碎
你說過愛在我的身邊
悄悄看我熟睡
聽說你在這刻想我
聽說你在記起我
我也記著每刻往事
也記掛你在哪兒
時日如飛　今天在我心裡是充滿不褪的記憶
時日如飛　我似呆在這地
任一天天過去　任一生飄過去
任一切飄去再沒法追
心中想你　如今想你
懷念昨天的你
懷念著你　懷念著你
紅著淚眼在記起
心中想你　如今想你
懷念昨天的一切
懷念著你　懷念著你
流著淚自覺得深愛著你

家嘈屋閉

今日，全日留在姐姐家陪姐姐，吃完晚飯才離去；吃飯時發生了一段小插曲，老爸，老媽為了小事喺度鬧交，老爸十分之不爽，話老媽成日啄住佢，老媽又係既，佢要飲啤酒咪由他啦，成日係度吟，佢講乜你都駁佢，實反感啦；唉，好心啦，有乜好嘈呀！仲要喺呢啲時候，大家都心情唔好，嘈黎做乜！仲唔夠煩咩！吃完飯，便拿拿臨執野著鞋陪老爸返屋企！

都唔明佢地點解成日都鬧交，是情趣定是越來越看對方不順眼？但我諗是後者居多！唉！

Another bad news

今早，姐姐打電話來告知肚裡的ＢＢ沒了，已是第二次了，上次都是差不多時間（兩個月鬆啲）驗到ＢＢ沒有心跳；今次是意料之外懷孕，但因上次的不快經驗，今次佢都特別小心，工也返少了，待在家中休息；其實，我也迷信地怕ＢＢ小氣，沒有跟我的朋友提及，奈何．．．
上次小產，姐姐需要很長時間才ｒｅｃｏｖｅｒ，希望佢今次可以睇開啲．．．自問係個勁眼淺的人（千萬不要叫我去安慰人，我會比當事人更快哭出來），當聽到個消息時眼淚已忍不住流出來，只是說了兩句便掛了線，之後回定神才ｓｅｎｄ個ｓｍｓ俾佢；全日喺公司都無心機做野，心情極差，飯腳們看到我的樣子也各自ｓｅｎｄ　ｅｍａｉｌ慰問我發生什麼事，我還以為自己已裝作跟平常一樣，但原來我不是一個扮野高手，喜怒完全反映晒喺塊面上！多謝他們的關心！

放工後去了醫院陪佢做手術，幸好她的樣子也沒有異樣，不開心是一定有，但不是勁愁眉苦臉那種，可能要喊既今早午都喊夠！她說姐夫的心情比佢還差，當然啦，姐夫的爸爸身體出了事，而姐姐又．．．唉．．今個月份真是十分之不順！！

希望他倆能亙相扶持去渡過今次的不幸，彼此的感情從而加深！

Ｂａｄ ｎｅｗｓ

近月來，不停聽到身邊朋友的親人生了Ｃａｎｃｅｒ，朋友的父母，姐姐的老爺；昨天，舊男友Ｙ告知我他的三弟患了淋巴癌二期，記憶中，三弟是衆弟妹中最順得人的一個，跟我的感情也是最好的；現在應該三十歲也未夠，而他的孩子今年才一歲，聽到這個消息後十分不開心；可幸的是他能樂觀地面對，這應該跟他任職救護員有關，每日見盡不同類型的生死；我認為能抱著樂觀的心態，懷著正面的信念去對抗癌症，必定會事半功倍的！我由衷地希望你能打贏這場仗，加油呀！

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

跟友人說起近來什麼食物都有問題，唔係含致癌物質，就是對身體有害；啲生產商為了圖利，埋沒良心，加這加那，為的就是令到個蛋黃的顏色靚啲，牛奶的蛋白質多啲，啲魚肥些。。。真係無良！

仆街

不管你有幾嬲，你也不該駡我＂仆街＂。。。正如你說這比較直接，對，直接地去傷我的心！

說真的，我沒有黑口黑面，只是當你呆等了2個鐘的時候，那只是一個等到發呆目無表情的樣子，難到我還可以笑得出嗎？！好了，終於可以出門口，一去到巴士站，你便一支箭的衝了上你要坐的車，我呢，便孤身行到另一個巴士站等，那時才開始光火，頂！原來呆等了2個鐘，就是為了一齊搭電梯落街！明白晒！你硬說我一早已黑面（會唔會係你自己都覺不好意思呀）我又可以點？ 只是想問，易地而處，你又會怎樣？ 這只是小事一樁，弄到這樣子值得嗎？

其實近來你跟我說話的態度也是凶巴巴，沒禮貌，我也跟你投訴過，只是你不在意。。。算了，已過去了！

宣傳電話－變靚啲

早前跟車厘子說起成日收到變靚啲的宣傳電話，原來佢都係；不論你拒絕了多少次，電話還是繼續來，多討厭！於是我倆便無聊地想著下次如何應對。。。

我：不如反問佢知唔知我係邊個，我係李嘉欣，你話我仲使唔使變靚啲呀？！下次check清楚先打黎
車厘子：但可能佢會話李嘉欣都係佢個客喎。。。
我：係喎，李嘉欣可能去過佢度整容，諗過另一樣個！
車厘子：我已經好靚，唔使再變靚啲，依家太多狂風浪蝶應接不遐，可唔可以幫我變醜啲。。。我：呢個都唔錯，我又諗到另一個；其實我喺瑪花度做，係你地行家喎，不如大家交換個call list呀，好唔好？
：
：
我倆想著對方唔知會有咩反應，係電話度狂笑。。。（其實我地自娛居多．．．）

幾日後，又收到她們的來電，雖然之前想到那麼多的應對，但當日正忙著，沒有時間應酬她們，最後也跟往時一樣，在她們表明身份後便九秒九cut了線！嘥晒！

另有一日，車厘子興高采烈打黎話某大連鎖美容院打電話邀請佢上去做免費facial，以下是她們的對答：－

X小姐：小姐，為慶祝本我地某分店的開幕，依家送你一次免費facial
車厘子：你地開分店關我咩事，而且我都唔做facial ge…
X小姐： 咁仲好啦，可以有機會免費試做，唔使錢又可以睇下啱唔啱你麻
車厘子：咁我肯犧牲左第一次上黎你公司做facial，你地會唔會俾番錢我架？！
X小姐 ：er…（立即啞晒，唔知講乜）應該唔會啦! （我覺得佢個心講緊粗口鬧車厘子）
車厘子：既然唔會，咁你地唔好再打黎！（說畢，立即收線，費事俾機會佢還擊，絕呀！）

ＯＫ，我明人地都係為兩餐搵生意，但當你正忙著時收到這些窮追不捨的電話，你真係想鬧人架！！

小氣

世事啲野就係咁，你唔講好地地，一講就賴野，好小氣架！

前幾天當好友So給我澳洲手信時(是一支飛滋噴霧)，我還懶勁咁跟她說不用了，叫佢俾埋大N， 因為我話會生暗瘡的人是很少生飛滋的；車厘子也認同！
不知是否飛滋們聽到我的呼喚出來跟我Say hello或是它們覺得我太囂張要來懲罰我，三天後我便生了粒飛滋(很久已沒有生過，大大話話都超過半年)，頂！ 今次真係衰口多！我諗我講完唔記得touchwood。。。

昨天晚上有機會試用了那支噴霧 (好彩無俾到大N)，澳洲牌子Natural Life，它旳成份主要是蜂蠟Propolis和蜜糖Manuka UMF10＋，我食緊隻蜜糖都係呢款，好似好Natural 咁！功效如何暫時未知，噴後的感覺是有啲乸乸地。。。